ملف شامل اطباق النخبه

الأرز باللبن المصري

المقادير:

2 كيلو لبن
1/2 كوب أرز مصري مغسول أو ثلاث اربع كوب بالكثير

سكر حسب الطلب

فانيليا

قرفة/ مكسرات/ قشطة/ عسل نحل للتزيين

الطريقة

اغلي الحليب وبعدين ضيفي له الأرز المغسول والسكر حسب ما تحبي تحليه وحطيه على نار هادية خالص مع التقليب

لحد ما تحسي ان الرز استوى وابتدى الحليب يثقل شوية

اطفى عليه وضيفي له الفانيليا وقلبيه كويس

اغرفيه في الأطباق للتقديم

للتزيين

ممكن قطعة قشطة + ملعقة عسل نحل + شوية مكسرات مطحونة

أو

قرفة فوق الوجه

أو جوز هند وزبيب ومكسرات

لو لاحظتم انا مش بأحط نشا ولا مياه في الأرز باللبن علشان يكون طعمه لبن خالص، والأرز بيقوم بمهمة النشا وبيلفه

بالهنا والشفا (خلوا بالكم ما تسبهوش يتقل قوي احسن يبقى مش حلو يعني يدوب تحسي انه اللبن قل شوية لما تغرفي ملعقة تلاقي الثلثين أرز والثلث لبن تقريبا)

الكشري

المقادير

1-كوب عدس بجبة بلدي أو غير (الحباية البلدي بتكون أصغر)
2- 2 كوب ونصف أرز مصري
3- بصلة كبيرة أو 2 متوسطين
4- راس ثوم مفرومة
5- لتر عصير طماطم
6- زيت
7- مكرونة حجم صغير (اصغر حجم بنسميها في مصر خواتم)
8- حمص مسلوق (انقعيه شوية لمدة 3 ساعات مثلا وبعدين اسلقيه في ماء مع ملح وكمون وشطة وعصير ليمون وطماطمية مقطعة)

الطريقة

أولا: الكشري

1- انقعي العدس بعد غسله في ماء دافئ لمدة ساعة او اثنين حسب وقتك

2- قطعي البصل ترنشات رفيعة وحمريه في 3 أو 4 معالق كبيرة زيت لحد ما يغمق لونه نشفيه من الزيت وخليه على جنب

3 - ضيفي العدس بعد تصفيته من الماء للزيت اللي حمرتي فيه البصل وقلبيه كويس وبعدين ضيفي له كوب ماء واتركيه على النار لحد ما تحسي انه قرب يستوي

4- بعد ما تحسي انه العدس قرب يستوي صفيه من ميته كويس وضيفي له الأرز بعد غسله وتصفيته

5- قلبيه كويس مع بعضه وبعدين سويه زى ما بتسوي الأرز وخدي بالك الماء ما يكونش كثير وضيفي الملح

6- بعد الكشري ما يستوي اطفي عليه واكشفي عنه الغطاء علشان يتهوي وقلبيه

ثانيا طريقة الصلصة:

1- حمري بعض من الثوم المفروم (فرم تخين مش ناعم قوي) في 2 او 3 ملعقة زيت كبيرة

2- بعد ما يصفر لون الثوم ضيفي له عصير الطماطم ، وقلبيه كويس واتركيه يغلي غلوتين وبعدين غطيه على نار هادية لحد ما يتسبك والصلصة تحمر (بعدين ضيفي الملح والكمون والفلفل الأسود وشطة حسب الحاجة)

ثالثا طريقة الدقة:

دقة الكشري بقى ايه

بتجيبي الثوم المدقوق المفروم وافرمي معاه ثمرتين فلفل أخضر أو احمر حامي، ضيفي لهم الخل والكمون والملح والفلفل الأسود والشطة (كله على البارد)


المكرونة اسلقيها عادي وصفيها


طريقة تقديم الكشري

على حسب راحتك

ممكن تغرفي المكرونة في الأول أو الآخر وبعدين تغرفي فوقها الكشري وترشي فوقه البصل المحمر وتقدمي جنبه الصلصة والدقة وحمص الشام وممكن فص ليمون لأنه بيكون هايل مع الكشري

بالهنا والشفا

حمام محشي

المقادير

زوج حمام ملين شوية

كوب فريك

بصلةمقطعة شرائح وبصلة مقطعة اربع

ملح + فلفل

ملعقتين سمنة

خيط وابرة

الطريقة

جهزى الحمام (من تنظيف والذي منه وخليه بحيث يكون الجلد حوالين الرقبة مووجود


طريقة الفريك:

حمري البصلة المقطعة شرائح في السمنةلحد ما تذبل

ضيفي لها الفريك المغسول بعد ما تنقيه كم ساعة

قلبي الفريك مع البصلة كويس وضيفي الملح والفلفل

احشي الحمام بالفريك من فوق عند الرقبة وخيطي الجلد حواليه (يعني الحشو بيكون بين جسم الحمامة والجلد

واحشي الحمامة برضه من الداخل وخيطي عليها من تحت

جهزي على النار مياه في حلة وضيفي لها البصلة المقطعة وطماطمية مقطعة وورق لوري وملح وفلفل بسيط واتركيه لما يغلي

ضيفي الحمام علشان يتسلق (اتاكدي انك خيطيه كويس علشان ما يسربش الفريك

لما تحسي ان الحمام استوي

انشليه من المياه وصفيه وبعدين حمريه في السمن البلدي

بالهنا والشفا

الجلاش بالكريمة


لفة جلاش
وتقطعيها مربعات صغيرة
بحيث انك لما تلمي كل طرفين متقابلين يعمل لك مثلث في النهاية زي السمبوسة فهماني ؟؟؟


الحشوة

2ونص كوب لبن
نص كوب نشا
2 ملعقة سكر


تضعي اللبن بارد ع النار وتضيفي ليه النشا والسكر ع البارد
وع النار بعد كده لحد ما تصبح زي الكريمة او المهلبية وتنزليه لحد ما يبرد وتحشي بيه الجلاش


وشربات او شيرة زي ما بيقولوا عليها في الخليج



بصي بقا


تجبي المربعات ومابين كل ورقة والتانية تضعي نقطة زيت او سمنة حسب رغبتك
زي ما بتعملي الرقاق كده فهماني؟


بس والمربع الواحد يكون عبارة عن 10 ورقات جلاش او اكتر حسب ما بتحبي الكثافة


بس

وكل مربع تحطي فيه معلقة كريمة من دي وتقفليه
كل طرفين متقابلين تلميهم مع بعض

بحيث تكون مثلث يكون شكله في النهاية زي السمبوسة


بس وتدهني صينية وترصيهم فيها بس يكون ما بين كل واحدة والتانية مسافة عشان تحمر كويس

وتدهني وش كل واحدة بالزيت عشان تحمر


وتدخليها الفرن نار هادية لمدة 10 دقايق

وبعد ما تحمر تخرجيها وتشربيها شربات بس مش كتير
لانه لو كتير هتكون طرية ولزقا في بعضها


ولو بسيط هتكون مقرمشة وشكلها شيك اوي اوي وورق الجلاش مفرش عن بعضه زي ورق الكراسة وشكله يخبل

وممكن ترشي علي وشه مكسرات مفرومة

مسقعة ، ايه رأيكم


المقادير

1 كيلو باذنجان رومي (الأسود المدور)
1 لتر طماطم معصورة تقريبا
ثوم مهروس (حوالي 3 فصوص)
4 ثمرات فلفل أخضر حامي
ملح

لحم مفرومة معصجة (اختياري)

الطريقة:

قشري الباذنجان وقطعيه دوائر زى البطاطس لكن متوسطة السمك
بعد غسله صفيه من المياه ورشي عليه ملح طبقات علشان ما يشربش زيت في التحمير

بعد ما الباذنجان ترشيه ملح وتتركيه نصف ساعة ولا حاجة هتلاقيه صفى مياه كثيرة منه صفيه، واعصريه وحمريه في الزيت بحيث ما يتحرقش يعني لونه يصبح بني فاتح

صفيه من الزيت

2- حمري الثوم المهروس في الزيت (حوالي ملعقتين أو 3 زيت) لحد ما لونه يصفر، ضفي له عصير الطماطم، واتركيه على نار متوسطة يتسبك

3- شقي ثمرات الفلفل بالطول من غير ما تفصليه وضيفيها للصلصة علشان تستوي فيها غطيها وسيبيها على نار هادية

4- بعد الطماطم ما تتسبك نصف تسبيكة ضيفي لها الباذنجان وقلبيها واتركيها على النار لحد ا تتسبك خالص

اطفى عليها وبالهنا والشفا

لو هتضيفي لها لحم مفروم معصج تحطي وانتي بتضيفي الباذنجان طبقة لحمة معصجة وطبقة باذنجان

المعكرونة بالباشميل

المقادير

1- 1/2 كيلو لحم مفروم + بصل لزوم التعصيج
2- كيلو ونصف حليب
3- من كوب لكوب ونصف دقيق تقريبا
4- سمن
5- لتر عصير طماطم
6- تشكيلة توابل (ملح + فلفل اسود+ بهارات+ قرفة+ حبهان)
7- واحد ونصف باكيت مكرونة فرن (بنقول عليها في مصر قلم) مسلوقة ومتصفية
8- بيضة واحدة مضروبة بالشوكة ومعاها ملح وفلفل اسود قليل
9- جبنة موتزريلا أو رومي مبشورة (اختياري)
الطريقة

اولا اللحم:

1- حمرى بصلة مبشورة في ملعقتين سمنة لحد ما تذبل
2- ضيفي لها اللحم المفرومة وقلبيها كويس على نار هادية واتركيها لحد ما تستوي وتشرب ميتها
3- ضيفي لها عصير الطماطم والتوابل وقلبيها على نار هادية لحد ما تتسبك

ثانيا الباشميل:

انا بصراحة باستعمل طريقة سهلة ومن غير سمنة ومش بتأثر في الطعم على فكرة، جربوها وابقوا ادعولي (ده شرطي الوحيد تدعولي )

1- يا ريت يكون اللبين بارد علشان يريحك ، حطي في الخلاط حوالي 1/2 كيلو لبن وضيفي له حوالي كوب شاى دقيق (كوب صغير) اضربيه في الخلاظ لحد الدقيق ما يدوب

2- صبيه في حلة تيفال (احسن من الألمنيوم علشان ما يلزقش) وعلى نار هادية قلبيه بشويش

3- لما تحسي انه قرب يتماسك، اضربي باقي اللبن في الخلاط مع نصف كوب دقيق تقريبا وضيفي نصفه للخليط اللي على النار (يعني ما تضيفيش كل المقادير مرة واحدة علشان لو لاقيتي نفسك محتاجة دقيق او لبن تاني ، طيب؟ )

المهم تكون النهاية انك عملتي الكيلو والنصف لبن كله

لما تلاقي الباشميل لف معك زى المهلبية بس اتقل شوية صغيرة اطفي عليه وضفي له ملح وفلفل

ثالثا المكرونة:

هاتي صينية مستطيلة او مدورة اللي يريحك من المقاس الكبير (حوالي 28 سم تقريبا يعني بتكون وسط تقريبا ) ويستحسن تكون تيفال

ادهني الصينية سمنة

حطي المكرونة كلها فيها
حطي عليها اللحم المعصجة بالطماطم وقلبيهم كويس
حطي نصف كمية الباشميل او اكثر فوقها وقلبيهم برضه كويس

(دلوقت بقت الصينية فيها مكرونة مع اللحم مع نصف الباشميل متقلبة كويس، طيب؟) افرديها في الصينية كويس

هاتي الجبنة الموتزريلا او الرومي المبشورة وحطيها فوق الوجه بحيث تعمل طبقة
كملي الطبقة الأخيرة بالباشميل فقط (باحط الجبنة قبل الباشميل علشان ما تنشفش وتبقى بتشد زى البيتزا)

ادهنى الوجه بيض

دخليه في الفرن (بتاخد من ساعة لساعة ونصف) وبالهنا والشفا

الفتة المصري

المقادير

1- عيش مقطع مكعبات ومحمر بالسمن ومتصفي (حوالي رغيفين)
2- كوب ونصف أرز مصري
3- حوالي لتر عصير طماطم
4- ثوم مهروس
5- خل
6- 5 ملاعق سمنة او حسب الرغبة
7- مرقة لحم

الطريقة:

اولا الصلصة:

حمري 4 او 5 فصوص ثوم مهروس في السمنة لما يصفر لونه ضفي له حوالي 3 ملاعق كبيرة خل وقلبيه، وضفي عصير الطماطم

قلبيه غلوتين واتركيه على نار هادية لما يتسبك وبعدين ضيفي لها ملح

رصي العيش المتحمر في طبق التقديم يكون غويط وكبير (طبق الفتة)
صبي عليه المرقة وهى سخنة يعني بحيث يكون الثلثين شوربة والثلث خبز (مش عاوزين العيش يعجن)
قلبيه كويس وغطيه

اتركيه لمدة عشر دقائق ولا حاجة بحيث ما يعجنش العيش

بعد كده ضيفي له نصف كمية الصلصة المتسبكة وهى سخنة وقلبيه ثاني وغطيه لمده 5 او 10 دقائق تانية

اعملي الأرز أبيض مفلفل عادي (قلبي كمية الرز المغسولة كلها في ملعقتين سمنة وبعدين ضيفي لها ميه بحيث تغطي الأرز وضيفي له الملح) لما يشرب المياه حطيه على نار هادية وغطيه لحد ما يستوي

حطي الرز فوق وجه العيش ووزعيه بحيث يعمل طبقة

هاتي باقي الصلصة ووزعيها فوق وجه الفتة على شكل حلو

حمري ثومة مهروسة في ملعقتين سمنة وضفي لهم ملعقة خل ورشيها فوق الفتة بالتبادل مع الصلصة

حطى اللحمة المسلوقة فوقها وبالهنا والشفا

المحشي

المقادير :

1- بصلة أو اثنين كبار مبشورين
2- 1.5 لتر عصير طماطم أو حسب الكمية المطلوبة (بس كل ما الطماطم يكون كثير كل ما يكون المحشي هايل)
3- 3 حزم شبت (الشبت الكثير بيعطي المحشي طعم ونكهة جميلة)
4- حزمة بقدونس
5- كم حبة فلفل أخضر حسب الحاجة
6- ملح + فلفل أسود مطحون + كمون مطحون

الطريقة

1- يتم تحمير البصل المبشور في الزيت لحد ما يطرى ولونه يبدأ في الاصفرار
2- يتم اضافة عصير الطماطم والشبت والبقدونس بعد تقطيعهم قطع صغيرة جدا
3- اضافة الفلفل الأخضر بعد تقطيعه
4- اضافة الملح والفلفل والكمون
5- بعد التقليب، ننتظر لحد ما ياخد غلوتين على النار ويبدأ لون عصير الطماطم في التغير ، يترك على نار هادئة الى أن يتسبك خالص وتصبح لونه أحمر غامق
6 - يتم غسل الأرز منفردا وتضاف اليه كمية الخلطة حسب الحاجة ويتم استخدامه في الحشو

بعد الحشو نضيف جزء من الخلطة بدون أرز الى الحلة مع قليل من الشوربة وبعد ما ياخد غلوة نضعه على نار هادئة الى أن يستوي

(يمكن الاحتفاظ بباقي الخلطة بدون أرز لمرات أخرى في الفريزير)

ملحوظة يتم تغطية حلة المحشي بالضبط زى طريقة عمل الأرز

وبالهناء والشفاء

الشكشوكة بأحبها قوي على الفطار او العشا وممكن تضيفي لها لحم وممكن لأ

المقادير

3 بيضات
2 ثمرة فلفل حار او حسب الرغبة
3 طماطميات
(لحم معصجة) اختياري
4- ملعقة سمنة

الطريقة

قطعي الطماطم مكعبات والفلفل شرائح بالعرض وقلبيهم في السمن على النار، اتركيها لما تتسبك ، وضيفي لها البيض وقلبيها لحد ما يستوي اطفي عليه وضيفي ملح وفلفل

لو عاوزة تضيفي اللحمة قلبي اللحم مع التسبيكة وبعدين ضيفي لها البيض

(ممكن تضيفي جبن رومي مبشورة للطريقة الأولى هتبقى ايه

شوربة

كوبين عدس أصفر منقى ومغسول

بصلة مقطعة

طماطمية او 2 مقطعة مكعبات

فصين ثوم مهروس

ملح، فلفل، كمون

ثمرة بطاطس مقطعة مكعبات

3 جزرات أو 4 مغسولين ومقطعين حلقات

الطريقة :

اغلي العدس والطماطم والجزر والبطاطس في الماء لحد ما يستوي

اضربيه في الخلاط بالماء بتاعه كويس ولو حاسة انه محتاج ضفي له ماء تاني علشان يكون ثقله مضبوط

رجعي الخليط في الحلة وضيفي له الملح والفلفل والكمون والثوم واتركيه لحد ما يغلي

دلوقت عندك اختيارين

ممكن تشربيه كده وممكن تحمري شوية شعرية في زيت أو سمنة وتحطيها مع العدس تغلي لحد ما تستوي ، وأنا باحبه بالطريقة الأولى

البيكاتا بالشمبنيون (الفطر)

المقادير :

نصف كيلو لحم بيكاتا (ده جزء معين من أجزاء العجل بيكون في عرق التربيانكو- قولي للجزار عاوزة نصف كيلو تربيانكو لو هو مش عارف البيكاتا)

وخليه يقطعها شرايح فيليه ويقطعها بالطول بحيث عرضها عرض الاصبع او اعرض يعني عرضها مثلا 3 سم وسمكها سمك الفيليه العادي

بصلة متوسطة مبشورة

ملعقتين سمنة

ملعقتين دقيق

علبة مشروم (فطر) صغيرة ويكون مقطع جاهز

ملح وفلفل

الطريقة:

1- اغسلي اللحم كويس وصفيها من المياه
2- تبليها بالملح والفلفل
3- هاتي 4 ملاعق سمنة في طاسة تيفال
4- حمري شرائح اللحم بحيث تاخد لون فقط يعني ما تسويهاش ولا تحمريها قوي
5- حمري البصلة المبشورة في ملعقتين سمنة لحد ما تغمق (لون البصلة هو اللي بيحدد لون البيكاتا بعد كده- يعني لو عاوزاها افتح حمري البصلة بلون فاتح)
6- ضيفي لها ملعقتين دقيق وقلبيها جيدا لحد الدقيق ما يفك
7- ضيفي لها اللح
8- ضيفي لها كوبين مياه واتركييها على نار هادية مع التقليب باستمرار علشان ما تلزقش
9- كل ما تحسي ان المياه ابتدت تقل والصوص تقل واللحمة لسة ما استوتش ضيفي نصف كوب مياه او كوب زى ما تحبي
10- لما اللحمة تقرب تستوي ضيفي لها المشروم بعد ما تصفيه
11- قلبيه مع اللحم كويس وخليه ياخد غلوتين
12- خلي شوية صوص في اللحمة يعني نصف الصينية مثلا علشان بنقدمها مع أرز أبيض

وبالهنا

الملوخية

المقادير

نصف كيلو ملوخية مخروطة

حوالي كوبين شوربة او 3

ملح

ثوم مهروس مع كزبرة ناشفة

5 ملاعق سمنة

الطريقة

ضيفي الشوربة بالتدريج للملوخية يعني كوب كوب علشان ما تلاقيش الشوربة اكثر

قلبيها كويس لحد ما تفك كلها في الملوخية وتكون سمكها لما ترفعي الملعقة وتصبيها تاني متصلى يعني مش تخليها صايصة وتندلق من الملعقة بسهولة

فهماني يا سمسمة ركزي يعني تلاقي اللون الأخضر هو الغالب في الملوخية مش لون الشوربة بس كمان ما تكونش تقيلة قوي

المهم حطيها على النار تغلي غلوتين لحد ما تلاقيها هتفور اطفى عليها

حمري الثوم والكزبرة في السمنة وهى ساخنة طشيها في المولخية

بالهنا والشفا

ملحوظة: لو لاقيتها محتاجة شوربة او ملح قبل ما تشطي التقلية زودي لها شوربة او ملح

التبوله


المقادير : (لحوالي 3 أشخاص)

عدد 3 ضمة بقدونس خضراء نضرة
عدد 8 الى 10 أوراق نعنع (مش جذوع - الورق فقط)
عدد 3 حبات بندورة حمراء (طماطم) جامدة
عدد 3 بصلات خضراء بجذوعها الخضراء
برغل ناعم بمقدار نصف فنجان قهوة (حجم فنجان قهوة كامل اذا تحبون البرغل كثير)
عدد 2 ليمون حامض معصور
ملعقة صغيرة ملح
زيت زيتون بمقدار واحد و نصف فنجان قهوة ( 1 و 2/1)
رشة فلفل أسود وفلفل حلو وقرفة اي دارسين (رشة صغيرة جدا)
و رشة فلفل حار (او أكثر حسب الرغبة)
رشة سماق

الطريقة :
-يفرم البقدونس ناعما بسكين حاد و يغسل بالماء و يفوح على الأقل 4 مرات حتى تتأكدي من نظافته و يصفى
- يغسل النعنع و يصفى و يفرم و يدفن في داخل البقدونس المفروم حتى لا يسود
- تفرم البندورة ناعمة
- يفرم البصل الأخضر مع أوراقه ناعما
( بعد الفرم أنا عادة أضع البندورة و البصل في وعاء فوق البقدونس و النعنع المفروم و أضعهم في الثلاجة أي البراد بدون خلطهم مع بعض حتى يحين وقت التقديم مع الحرص على اغلاق الوعاء بورق البلاستيك اللاصق حتى لا تنتشر رائحة البصل في الثلاجة)

- يغسل البرغل الناعم و يصفى و ينقع مع عصير الليمون و الزيت و البهارات المذكورة أعلاه. (يفضل نقعه قبل نصف ساعة او ساعة فقط قبل التقديم)
- عند التقديم يتم خلط الخضراوات المفرومة أعلاه ببعضها مع مزيج البرغل المنقوع

و تقدم التبولة الى جانبها أوراق الخس أو أوراق الملفوف

و الف صحة

البامية

المقادير

نصف كيلو بامية مغسولة ومتقمعة
بصلة متوسطة مبشورة
نصف كيلوا لحم (ضاني او بتلو او حتى كندوز)
لتر عصير طماطم
3 ثومات مهروسين مع ملعقة صغيرة كزبرة ناشفة
3 ثمرات فلفل اخضر حامي
ليمونة

الطريقة

حمري البصلة في ملعقتين سمنة لحد ما تذبل وضفي لها الثوم المدقوق مع الكزبرة وحمريها لحد ما الثوم يتحمر

ضيفي لها عصير الطماطم واتركيها تاخد غلوتين وبعدين على نار هادية
شقي الفلفل بالطول من غير ما تفصليه وضيفيه للطماطم وضيفي لها البامية وقلبيها واعصري الليمونة عليها
غطي الحلة واتركيها على نار هادية لحد ما تتسبك

لو احتجتي ممكن تزوديها شوربة

لو حبيتي تضيفي لحمة، بتسلقي اللحمة وقبل ما تستوي تنشليها من الشوربة وتقلبيها مع البصلة قبل ما تضيفي الطماطم

الحواوشي

المقادير

نصف كيلو لحم مفروم

بصلة كبيرة مبشورة

2 طماطم مقطعة مكعبات

3 فلفل اخضر حامي مقطع ترنشات

توابل (ملح + فلفل+قرفة+بهارات)

سمنة سايحة

3 رغيف عيش بلدي مقطع اربع (يعني كل رغيف مقسم اربعة

الطريقة

اخلطي البصل والطماطم والفلفل والتوابل على اللحم وقلبيهم كويس

ادهني كل ربع رغيف من جوة وبرة في الوجه سمنة واحشيه بجزء من خليط اللحم

بعد ما تخلصي حطي العيش المحشي لحم في صينية في الفرن موزعين يعني حاولي ما يكونوش فوق بعض ودخليها الفرن لمدة ربع ساعة وبعدين طلعيها واقلبي العيش على الوجه الثاني علشان يتحمر

وبس خلاص ، وقدميه مع سلطة خضرا

بالهنا

خلطة البانيه على السريع

4 فلفل اخضر
بصلة متوسطة
مايونيز
ملح + فلفل + قرفة + بهارات
ربع فنجان زيت
2 بيضة

قطعي الفلفل والبصل في الخلاط وضيفي لهم 4 ملاعق مايونيز والتوابل والزيت زاضربيهم في الخلاط كويس مع البيض

تبلي الفراخ البانيه بهم

هاتي نصف كوب بقسماط وربع كوب دقيق وقلبيهم

انشلي الفراخ من التتبيلة وقلبيها في الدقيق والبقسماط وحمريها في زيت غزير

بالهنا

كفتة الأرز (كفتة مصري)

المقادير

كوبين ونصف أرز مصري مغسول
نصف كيلو لحم جملي مفروم
بصلة متوسطة
بقدونس وشبت (حوالي 10 فروع - فروع مش حزم) يعني تقريبا نصف حزمة او ربع
3 فصوص ثوم
ملح + فلفل + بهارات

افرمي المقادير كلها في المفرمة كويس لحد الأرز ما يختفي (لو هتعمليها في البيت افرمي الأرز لوحده الأول)

ضيفي لعجينة الكفتة ربع كوب زيت وقلبيها كويس

صبعيها وحمريها في الزيت


طريقة الطبخ

حمري بصلة مبشورة في ملعقتين سمنة لحد ما تذبل البصلة

ضيفي لها لتر عصير طماطم وقطعي فيها 2 ثمر بطاطس مكعبات

اتركيها تغلي على النار لمدة 5 او 10 دقائق

ضيفي لها الكفتة المتحمرة واتركيها على نار هادية بعد ما تغطي الحلة

قدميها مع رز ابيض وسلطة

وبالهنا

المقادير

2 باكيت سيمون فيميه شرائح
لتر عصير ليمون صافي
4 باكيت توست ريش بيك
تونة
مايونيز

خص

الطريقة

هاتي صينية مستطيلة على حسب الحجم اللي انتي عاوزاه

هاتي التوست وجمعيه جنب بعضه وساوي اطرافه بحيث تشيلي الطرف البني اللي فيه

اخلطي التونة مع عصير ليمون ومايونيز

تبلي شرائح السيمون فيميه في عصير الليمون كويس

رصي طبقة من التوست في الصينية
بعدين طبقة مايونيز وتونة
بعدين طبقة توست
بعدين طبقة مايونيز وسيمون فيميه
بعدين طبقة توست
طبقة مايونيز وتونة
آخر طبقة تكون من التوست

هاتي طبق التقديم ويكون اكبر من الصينية

غطي بيه الصينية واقلبي فيه القالب كله

هينزل معك مستطيل في طبق التقديم

هاتي باقي شرائح السيمون فيميه وغطي بها جوانب التوست ومن فوق بحيث يبقة الطبقة النهائية كلها سيمون فيميه

جملي طرف الطبق بالخص

بالهنا والشفا

البوري في الفرن

المقادير

كيلوا سمك بوري حجم وسط (الكبير بيكون سمين قوي)
2 طماطم مقطعة ترنشات
بصلة كبيرة مقطعة شرائح
عصير 5 ليمونات
3 ملاعق زيت
2 فلفل اخضر حامي
ملح وفلفل وكمون
ثوم مهروس

الطريقة

بعد تنظيف السمك صفيه من المياه

اخلطي باقي المقادير كويس واحشي بها السمك واللي يفيض حطيه فوق الوجه في الصينية

دخليه الفرن في نار متوسطة او عالية لحد ما يشرب ميته ويحمر وجهه

بالهنا والشفا

الكشك واحدة الماظية والتانية كشك صعيدي

واحدة بتتعمل بالرز والتانية بالدقيق


المقادير

3 ملاعق دقيق تقريبا
2 كوب لبن
بصلة مقطعة شرائح ومحمرة في السمنة

الطريقة

دوبي الدقيق في نصف كوب لبن تقريبا أو أقل

اخلطيه مع باقي اللبن وقلبيه على النار لحد ما يثقل شوية ويبقى زى المهلبية تقريبا

لو احتجتي دقيق دوبي شوية في سوية لبن وضيفيه بنفس الطريقة

المهم لازم تداومي على التقليب علشان ما يكلكعش

بعد ما تطفي عليه انشلي البصل من السمنة ، وضيفي السمنة فوق وجه الكشك وبعدين جمليه بالبصل

وبالهنا والشفا

بقلاوة

المقادير

باكو جلاش

مكسرات (اختياري)
سمنة سايحة
شربات (كوبين سكر + كوب ونصف ماء + عصير نصف ليمونة + فانيليا) لما الماء والسكر يغلي كم مرة ويدوب السكر خالص وتلاقيه زى ما وصفت لمسلمة مصرية اطفي عليه وضيفي له فانيليا هتخلي ريحته حلوة قوي

الطريقة

ادهني الصينية سمنة

افرشي ورق الجلاش فيها وادهني كل ورقة تحطيها سمنة بالفرشة (لو حبيتي تحطي مكسرات حطيها في النصف وكملي الباقي عادي)

بعد ما تخلصي ادهني الجلاش من فوق سمنة ودخليه الفرن لما يتحمر

خرجيه ورشيه بالشربات البارد ويكون الجلاش ساخن

وبالهنا والشفا

العاشوراء

المقادير

كوب قمح مجروش منقى ومغسول ومنقوع

3 كوب لبن تقريبا ممكن 4 او اكثر

3 او 4 معالق نشا

مياه

سكر

مكسرات للتجميل

الطريقة

اغلي القمح في مياه لحد ما يتسلق ويستوي وينفش ويبقى زى البليلة

صفيه من المياه على قد ما تقدري

حطي اللبن وممكن تحتاجي لبن اكثر لأن القمح بيزيد في النار

ضيفي السكر وقلبي لحد ما يذوب السكر في القمح واللبن

ذوبي النشا في ربع كوب لبن وضيفيه للقمح وقلبي

بعد ما تلف معك زى المهلبية والأرز باللبن (يعني مش تخينة قوي ومش مية) ولو احتجتي ممكن تضيفي لها نشا ولبن تاني (في كل الأحوال النشا يذوب في اللبن الأول قبل ما تضيفيه)

بعد ما تتقل اطفي عليها

وضفي لها الفانيليا وقلبيها

اغرفيها في اطباق التقديم وزيني الوجه بالمكسرات

سلطة بطاطس بالمسطردة


حبات بطاطس مسلوقة"او اي كمية تحبيها"
بسطرمة بعد نزع الثوم منها
كسبرة
م.مسطردة
بصل+ثوم+زيت+خل+ملح وفلفل

نقطع البصل شرائح صغيرة ونحطه علي نار هادئة حتي يدبل قليلا ثم نضع البسطرمة ونشوحهم عالنار.....ثم نقطع عليهم البطاطس المسلوقة الي مكعبات صغيرة ونضع الكسبرة ونقلب شوية عالنار
بعدين نرفعه ونضع الملح والخل والمسطردة ولو عندك بهارات حطي هتديها طعم حلو
وتؤكل باردة

مكرونة بابارديل مع الفلفل وصلصةالطماطم

المقادير:
1. بصلتان متوسطتان
2. كوب من الطماطم الجافة
3. كوبان من مرق الدجاج
4. ربع كوب ورق بقدونس
5.فصين ثوم مقطعة
6. ربع كوب معجون طماطم
7. حبتين فلفل احمر حار
8. مكرونة بابارديل

الطريقة:
1. اخلطي الثوم والبصل والطماطم ومعجون الطماطم والفلفل بالخلاط الكهربائي حتى يصبح المزيج على شكل معجون
2. ضعي مقلاة تيفال فوق النار عندما تحمى اضيفي مزيج الطماطم حركي مدة عشر دقائق
3. اضيفي المرق اتركيها تغلي
4. خففي النار حتي تصبح الصلصة كثيفة
5. اسلقي المكرونة ثم صفيها
6. اخلطي المكرونة بالصلصة
7. قدميها بالبقدونس وجبنة البرميسان

كفتةالبطاطسبالتونه


المقادير:

1. حبات بطاطس مسلوقه
2. علبة تونه
3. بيض
4. بقسماط
5. ملح وفلفل أسود مطحون
6. كمون مطحون
7. قرفه مطحونه
8. ثوم مطحون حسب الرغبة
9. زيت للقلي

الطريقة:

1. ضعي البطاطس المسلوقه في زبديه واهرسيها جيداً ثمّ ضعي عليها التونه والبهارات حسب الرغبه واخلطيها جيدا
2. كوريها بشكل بيضاوي او باى شكل تريدين
3. ضعي في طبق البيض وفي طبق آخر ضعي البقسماط خذي كل واحده وضعيهاأولاً في البيض وقلبيها جيداً ثم ضعيها في البقسماط وقلبيها جيداً فيه
4. اقليها في الزيت
5. قدميها لعــــــائلتك في طبق زينيه بشرائح الطماطم والليمون والبقدونس والبطاطس المقلي